بیدر کے تعلقہ بسواکلیان میں حضرت شیر سوار بیت المال ٹرسٹ کی جانب سے جلسہ اولیاءاللہ و خدمت خلق کا انعقاد
بسواکلیان4 فروری( ناز میڈیا ) ضلع بیدر کے تعلقہ بسوا کلیان میں حضرت شیرسوار بیت المال ٹرسٹ کی جانب سے جلسہ اولیاءاللہ و خدمت خلق کا انعقاد عمل میں آیا۔
اس جلسہ کی صدارت خواجہ ضیاءالحسن جاگیردار ، سجادہ نشین و متولی درگاہ شیر سوار بسواکلیان نے کی۔سید جاوید چشتی نظامی شیر سواری سکریٹری حضرت شیر سوار بیت المال ٹرسٹ نے خطبہ استقبالیہ پیش کیا۔جلسہ کا آغاز قرآت کلام پاک سے ہوا جبکہ نعت شریف کا نذرانہ محمد زبیر نواز اور مسرور نظامی نے پیش کی ٹرسٹ کی جانب سے تمام مہمانان کی گل پوشی کی گئی ہے
اس موقع پر خواجہ معین الدین انجینئر ڈائریکٹر حضرت شیر سوار بیت المال ٹرسٹ بسوا کلیان نے ٹرسٹ کے قائم کرنے کے مقاصد اور اس کی کارکردگی بیان کی۔ ٹرسٹ کی جانب سے کیے جانے والے کاموں میں شرکت کرنے والے اور تعاؤن کرنے والے احباب کا شکریہ ادا کیا۔
جلسہ بعنوان اولیاءاللہ و خدمت خلق سے خطاب کرتے ہوئے مولانا سید رضوان پاشاہ قادری حیدرآباد نے اپنے خطاب میں کہا کہ اولیاء اللہ نے اپنی ساری زندگی اللہ کی رضا اور اللہ کے بندوں سے محبت کرنے میں گزار دی ۔
اولیاء کرام نے تمام مذاہب کے لوگوں کو ایثار قربانی ہمدردی اور اخلاص کا درس دیا۔انہوں نے کہا کہ ہم اکثر دیکھتے ہیں بڑے بڑے لوگ بڑی بڑی باتیں کرتے ہیں اور دور دور جا کر کام کرتے ہیں لیکن اطراف کے علاقوں اور وہاں کے لوگوں کو اپنے علم اور معلومات سے محروم رکھتے ہیں جبکہ اسلام اپنے گھر سے اپنے خاندان سے اور اپنے اطراف واکناف میں بسنے والے احباب کو تعلیم دینے کا درس دیتا ہے ۔
مولانا سید رضوان پاشاہ قادری نے ماں کی عظمت بیان کرتے ہوئے کہا کہ ماں کے قدموں کے نیچے جنت ہے اور وہ لوگ خوش قسمت ہیں جن کی ماں زندہ ہے اللہ کے رسول صلی اللہ علیہ وسلم نے صحابہ کو بار بار اپنی ماں کی خدمت کرنے کی تقلین کی۔ جلسے میں عزیز اللہ سرمست مدیر روزنامہ کے بی این ٹائمز گلبرگہ، خواجہ معین الدین انجینئر، خواجہ پاشا انعامدار سرپرست انجمن ترقی اردو گلبرگہ کے علاوہ ضلع گلبرگہ، بیدر کے مختلف تعلقہ جات کے خانقاہوں سے جڑی شخصیات و معززین شہر نے بطور مہمان خصوصی شرکت کی۔
0 تبصرے