اسرائیل کی جانب سے جنگ بندی کا اعلان فلسطینیوں کی فتح مبین:مولانا محمدتصدق ندوی

اسرائیل کی جانب سے جنگ بندی کا اعلان فلسطینیوں کی فتح مبین:مولانا محمدتصدق ندوی 

بیدر۔ 22مئی ( ناز میڈیا ) مولانا محمدتصدق ندوی جنرل سیکریٹری جمعیت علماء بیدر نے ایک صحافتی بیان میں کہاکہ نہتے کمزور فلسطینیوں نے اسرائیل کو گٹھنے ٹیکنے پر مجبورکیا،بے سروسامانی میں سینہ سپر ہوکر اسرائیلیوں کاڈٹ کرمقابلہ کیا اور انہیں جنگ بندی پر مجبورکیا.یہ دراصل نہتے فلسطینیوں کی جیت ہے۔حضرت ندوی نے مزید کہا کہ ہم سلام کرتے ہیں فلسطین کے ان جیالوں، بہادر بچوں اوربہادر بہنوں کو جو موت کو اپنے سامنے دیکھتے ہوئے بھی ذرہ برابرڈر اور خوف اپنے دل میں آنے نہیں دیا،دشمن کی آنکھ میں آنکھ ڈال کر ان کو للکارا، ان سے عاجزی انکساری نہیں کی اور نہ ان سے زندگی کی بھیک مانگی بلکہ مسجد اقصیٰ کی آزادی کے لئے غاصب اسرائیلیوں کے سامنے سیسہ پلائی ہوئی دیوار بن کر کھڑے رہے۔دنیا میں 57 مسلم ممالک ہونے کے باوجودسب خاموش تماشائی بنے ہوئے ہیں۔زبانی جمع خرچ کے علاوہ کوئی انکی مدد کے لئے تیار نہیں ہے،جبکہ ارض فلسطین کا دنیا کے مسلمانوں سے ایمانی رشتہ ہے۔ایمانی رشتہ خونی رشتہ سے زیادہ مضبوط ہوتا ہے۔پورا عرب یہودیوں کا غلام بن چکا ہے، جن کو اللہ نے دنیا کا امام بنایا تھاوہ خود غلامی کی زندگی بسر کر رہے ہیں،فلسطینی اپنی لڑائی خود لڑ رہے ہیں،چھوٹے چھوٹے بچے ٹینک کا جواب پتھر سے دے رہے ہیں،میزائل کا جواب غلیل سے دے رہے ہیں،ہمارے یہاں کو ئی بچہ پیدا ہوتا ہے تو ہم کہتے ہیں ہمارے بڑھاپے کا سہارا آگیا،لیکن فلسطین میں جب کوئی بچہ پیدا ہوتا ہے تو مائیں کہتی ہیں مسجد اقصیٰ کا محافظ ومجاہد آگیا۔11 دن میں اسرائیلی حملوں کے دوران 232 فلسطینی شہید اور1900 سے زائد زخمی ہوئے ہیں،شہیدوں میں 65 بچے اور 39 خواتین بھی شامل ہیں، جبکہ 1 لاکھ20 ہزارسے زائدافراد کے گھرملبہ کا ڈھیر بن چکے ہیں۔اتنے سارے ستم سہنے کے باوجودفلسطینیوں نے ہار نہیں مانی۔ برابر ان سے مزاحمت کرتے رہے،آخر کا اسرائیل کو جنگ بندی کا اعلان کرنا پڑا۔جنگ بندی کے اعلان کے بعدفلسطینی فرحت وانبساط سے جھوم اٹھے اورسڑکوں پر نکل کر جشن منایااور مسجد اقصیٰ میں وقت فجر سجدہئ تشکر بجالاتے ہوئے اللہ اکبر کے فلک شگاف نعرہ بلند کئے جس سے حرم گونج اٹھا اور خوشگوار ماحول میں نمازفجر ادا کی۔مولانا محمدتصدق ندوی نے اسرائیلی مصنوعات کا بائیکاٹ کرنے کی پُرزور اپیل کرتے ہوئے کہا کہ اسکو اپنی زندگیوں سے نکالیں،اپنے گھروں اور شاپنگ مال سے نکالیں،گندے لوگوں کی یہ گندی چیزیں ہیں،یہ بات ثابت ہوچکی ہے کہ کوک اور پیپسی ٹائیلیٹ کلینر ہیں، یہ ہماری صحت کے لئے شدید مضر ہیں۔اگر اسرائیل ایک طرف فلسطینیوں کو میزائل سے قتل کررہاہے تو دوسری طرف دنیا کے لوگوں کو انکی صحت خراب کر کہ مار رہا ہے۔مولانا محمدتصدق ندوی نے بھارت حکومت سے اپیل کی ہے کہ وہ اسرائیلی مصنوعات پر مکمل پابندی عائد کرتے ہوئے ہندوستانیوں کی صحت کی حفاظت کرے۔

NEWS & ADVERTISEMENT CONTACT 9880736910