21 جون سے ' مفت کورونا ٹیکہ ' وزیراعظم کا اعلان

21 جون سے ' مفت کورونا ٹیکہ ' وزیراعظم کا اعلان

نئی دہلی 8جون ( ناز میڈیا ) کورونا بحران کے درمیان وزیراعظم نریندر مودی نے پیر کی شام ملک سے خطاب کرتے ہوئے کورونا ٹیکہ کاری سے متعلق ایک بڑا اعلان کیا۔ انھوں نے کہا کہ 21 جون سے ملک میں 18 سال سے زیادہ عمر والے سبھی لوگوں کو حکومت ہند کے ذریعہ مفت ویکسین لگائی جائے گی۔ ساتھ ہی وزیراعظم مودی نے یہ بھی واضح کیا کہ ریاستوں سے ٹیکہ کاری کا کام واپس لیا جائے گا اور اب مرکزی حکومت ہی یہ کام کرے گی۔ یہاں قابل ذکر ہے کہ ابھی ویکسین کا 50 فیصد کام مرکزی حکومت، 25 فیصد ریاستی حکومتیں اور 25 فیصدی پرائیویٹ سیکٹر کے ہاتھ میں تھا۔ اب ویکسین کا 75 فیصد حصہ مرکزی حکومت اور باقی حصہ پرائیویٹ سیکٹر کو ملے گا۔جہاں تک مودی کے ذریعہ مفت ٹیکہ کاری کے اعلان کا سوال ہے، اسے اپوزیشن لیڈروں کے ذریعہ بار بار دباؤ دیئے جانے کا نتیجہ قرار دیا جا سکتا ہے۔ دراصل راہول گاندھی، پرینکا گاندھی، اکھلیش یادو اور دیگر کئی قائدین مفت ٹیکہ کاری کا مطالبہ کر چکے ہیں۔ حالانکہ پرائیویٹ سیکٹر میں ٹیکہ کاری کے لیے اب بھی پیسے لیے جائیں گے، لیکن اس تعلق سے بھی کچھ ہدایتیں دی گئی ہیں۔ بہر حال، وزیر اعظم نے آج ملک سے خطاب کرتے ہوئے واضح لفظوں میں کہہ دیا کہ اب کسی بھی ریاستی حکومت کو ویکسین کے لیے کچھ بھی خرچ نہیں کرنا ہوگا۔ اب تک ملک کے کروڑوں لوگوں کو مفت ویکسین ملی ہے، اب 18 سال کی عمر کے لوگ بھی اس میں جڑ جائیں گے۔ تمام شہریوں کے لیے حکومت ہند ہی مفت ویکسین دستیاب کروائے گی۔مذکورہ اعلان کے ساتھ ہی مودی نے پرائیویٹ سیکٹر کے ذریعہ ٹیکہ کاری کی پالیسی پر بھی بات کی۔ انھوں نے کہا کہ ہندوستان میں بن رہی ویکسین میں سے 25 فیصد پرائیویٹ سیکٹر کے اسپتال کے لیے براہ راست لینے کا انتظام پہلے سے ہے اور اب بھی ایسا ہی رہے گا۔ انھوں نے ویکسین کی قیمت کے بارے میں وضاحت کرتے ہوئے کہا کہ پرائیویٹ اسپتال ویکسین کی مقررہ قیمت کے بعد ایک خوراک پر زیادہ سے زیادہ 150 روپے ہی سرویس چارج لے سکیں گے۔ اس کی نگرانی کرنے کا کام ریاستی حکومت کے پاس ہی رہے گا۔اپنے خطاب میں مودی نے ٹیکہ کاری کے علاوہ مفت راشن تقسیم معاملے میں بھی بڑا اعلان کیا ہے۔ انھوں نے کہا کہ اب نومبر 2021 تک ملک کے 80 کروڑ لوگوں کو مفت راشن دیا جائے گا۔ مرکزنے گزشتہ سال بھی ایسی ہی اسکیم چلائی تھی۔ کورونا کی دوسری لہر کے درمیان ایک بار پھر بحرانی کیفیت پیدا ہو گئی ہے، چنانچہ اب حکومت پھر سے یہ اسکیم شروع کر رہی ہے۔

NEWS & ADVERTISEMENT CONTACT 9880736910