طلبہ امتحانات تک اِسمارٹ فون اور سوشیل میڈیا سے دُور رہیں: عامر علی خان

طلبہ امتحانات تک اِسمارٹ فون اور سوشیل میڈیا سے دُور رہیں: عامر علی خان

حیدرآباد۔ 5 فروری ( ناز میڈیا ) کانگریس کے ایم ایل سی جناب عامر علی خان نے ایس ایس سی اور انٹرمیڈیٹ سالانہ امتحانات کے پیش نظر طلباء و طالبات کو مشورہ دیا کہ وہ امتحانات کے اختتام تک اسمارٹ فونس اور سوشیل میڈیا سے دور رہیں اور اپنی ساری توجہ امتحانات کی تیاری پر مرکوز کریں۔ عامر علی خاں نے بتایا کہ یہ دو امتحانات ہر طالب علم کیلئے زندگی کا اہم مرحلہ ثابت ہوتے ہیں، لہٰذا طلبہ اپنی دیگر تمام مصروفیات، فنکشنس، کھیل کود، موبائل فون کے استعمال، ٹی وی پروگرامس، سوشیل میڈیا کی سرگرمیوں سے اپنے آپ کو دُور رکھیں اور اپنی تعلیم پر بھرپور توجہ دیں۔ ماضی کے نتائج گواہ ہیں کہ جو طلباء و طالبات سوشیل میڈیا سے دور رہتے ہوئے تعلیم پر توجہ مرکوز کرتے ہیں ، ان کے شاندار نتائج آئے ہیں۔ انہوں نے طلباء و طالبات کو مشورہ دیا کہ اسٹیڈیز کیلئے پہلے ٹائم مینجمنٹ بنائیں اور راتوں میں دیر تک جاگتے ہوئے پڑھنے کے بجائے علی الصبح اُٹھ کر پڑھنے کی عادت ڈالیں۔ حکومت کی جانب سے دسویں اور انٹرمیڈیٹ طلبہ کو امتحانات کی تیاری کیلئے خصوصی کلاسیس کا اہتمام کیا جارہا ہے۔ طلبہ کو چاہئے کہ اس سے بھرپور فائدہ اُٹھائیں۔ پری فائنل امتحانات کے نتائج کا محاسبہ کرتے ہوئے مستقبل کی حکمت عملی تیار کرنے کیلئے جن مضامین میں مارکس کم ہیں، اُن میں بہتری لانے کیلئے مزید محنت کریں۔ کانگریس ایم ایل سی عامر علی خان نے ٹیچرس کو بھی مشورہ دیا کہ وہ طلبہ کی تعلیم پر خصوصی توجہ دیں اور ساتھ ہی ریاست میں دسویں اور انٹر کے نتائج کے تناسب میں اضافہ کیلئے تمام تر کوششیں کریں۔ ساتھ ہی انہوں نے والدین کو بھی مشورہ دیا کہ وہ اپنے بچوں پر امتحانات میں بہتر نتائج کیلئے دباؤ نہ ڈالیں بلکہ ان کی حوصلہ افزائی کریں۔ عامر علی خان نے کہا کہ کبھی بھی محنت رائیگاں نہیں جاتی اور جو طلباء و طالبات اپنا 100فیصد وقت پڑھائی میں لگاتے ہیں، کامیابی اُن کے قدم چومتی ہے۔ شاندار نتائج کیلئے سب سے اہم نمازوں کی پابندی ہے۔

NEWS & ADVERTISMENT CONTACT 9880736910