بابا صدیقی قتل کیس کا ماسٹر مائنڈ ذیشان عرف یاسین آخرکار کینیڈا میں گرفتار!

بابا صدیقی قتل کیس کا ماسٹر مائنڈ ذیشان عرف یاسین آخرکار کینیڈا میں گرفتار!

ممبئی12 جون ( ایجنسی) این سی پی کے سینئر رہنما بابا صدیقی کے قتل کیس میں بڑی بین الاقوامی پیش رفت ہوئی ہے۔ کیس کے مفرور مرکزی ملزم ذیشان اختر عرف محمد یاسین اختر کو کینیڈا میں گرفتار کر لیا گیا ہے۔ ممبئی کرائم برانچ سے وابستہ ذرائع کے مطابق ذیشان کو حراست میں لے لیا گیا ہے اور اب اس کی حوالگی کے لیے کینیڈین حکام سے رابطہ کیا جا رہا ہے۔

ذیشان اختر پنجاب کے ضلع جالندھر کا رہنے والا ہے۔ تفتیش میں انکشاف ہوا کہ وہی اس قتل سازش کا ماسٹر مائنڈ اور تین شوٹرز — دھرم راج کشیپ، گرمیل سنگھ، اور شیو کمار گوتم — کا ہینڈلر تھا۔ پولیس کے مطابق، ذیشان نے ان شوٹرز کو ہتھیار، فنڈنگ اور ہدایات فراہم کیں۔

12 اکتوبر 2024 کی رات، بابا صدیقی کو ممبئی کے باندرہ علاقے میں ان کے بیٹے کے دفتر کے باہر گولی مار کر قتل کر دیا گیا۔ واردات کے فوراً بعد دو حملہ آور گرفتار کر لیے گئے تھے جبکہ تیسرا، شیو کمار، نیپال فرار ہونے کی کوشش میں بہرائچ (اتر پردیش) سے دھر لیا گیا تھا۔

پولیس تفتیش سے معلوم ہوا کہ شوٹرز نے واردات سے کم از کم دو ماہ قبل بابا صدیقی کے گھر اور دفتر کی ریکی کی تھی۔ ان کے پاس پستول اور زندہ گولیاں موجود تھیں اور وہ موقع کے انتظار میں تھے۔ جیسے ہی موقع ملا، انہوں نے اندھا دھند فائرنگ کر دی۔

اس واردات کی ذمہ داری لارنس بشنوئی گینگ نے قبول کی۔ ان کا کہنا تھا کہ قتل کا مقصد سلمان خان سے بابا صدیقی کی قربت تھا۔ اس دعوے نے سیاسی اور فلمی حلقوں میں سنسنی پیدا کر دی۔

ممبئی کرائم برانچ نے اس کیس میں سخت دفعات کے تحت کارروائی کی اور تمام ملزمان پر مکوکا (MCOCA) کے تحت مقدمہ درج کیا گیا۔ اس کے علاوہ پولیس نے 4,590 صفحات پر مشتمل چارج شیٹ عدالت میں داخل کی، جس میں سازش، نقل و حرکت، ہتھیاروں کی فراہمی، اور قتل کے مکمل منصوبے کی تفصیل شامل ہے۔

ذیشان اختر کی گرفتاری نہ صرف بھارت بلکہ بین الاقوامی سطح پر بھی انسداد دہشت گردی اور منظم جرائم کے خلاف بڑی کامیابی مانی جا رہی ہے۔ شبہ ہے کہ وہ جعلی پاسپورٹ کے ذریعے بیرون ملک فرار ہوا تھا۔ اب ممبئی پولیس اس کی حوالگی کے لیے قانونی کارروائی میں مصروف ہے، تاکہ مزید حقائق سامنے آ سکیں۔

NEWS & ADVERTISMENT CONTACT 9880736910