پرائیویٹ اسکولوں کی فیس میں بے تحاشہ اضافہ، والدین پریشان

پرائیویٹ اسکولوں کی فیس میں بے تحاشہ اضافہ، والدین پریشان

حیدرآباد 3 نومبر( ایجنسی)۔تلنگانہ میں پرائیویٹ اسکولوں کی جانب سے فیسوں میں غیرمعمولی اضافہ ایک مرتبہ پھر شدیدبحث کا موضوع بن گیاہے۔ والدین کاکہنا ہے کہ رواں سال متعدد پرائیویٹ اسکولوں نے سالانہ فیس میں 50 فیصد تک اضافہ کر دیا ہے،جبکہ اس بے لگام اضافے پر روک لگانے کےلیے کوئی مضبوط ریگولیٹری نظام موجود نہیں۔2026-27 کے تعلیمی سال کے داخلوں کا آغاز ہو چکا ہے، اور ایل کے جی، یو کے جی اور پہلی سے پانچویں جماعت تک داخلے جاری ہیں۔والدین کے مطابق فیسوں میں بے تحاشہ اضافہ نہ صرف بڑے انٹرنیشنل اسکولوں میں بلکہ کم بجٹ والے اسکولوں میں بھی یکساں دیکھاجارہا ہے۔مثال کے طور پر، جو اسکول گزشتہ سال پہلی جماعت کے لیے 80 ہزار روپے فیس وصول کر رہے تھے، وہ اب 1.1 لاکھ سے 1.5 لاکھ روپے تک چارج کر رہے ہیں۔والدین کاکہنا ہے کہ کئی اسکول مکمل سالانہ فیس ایک ساتھ جمع کرانے پر بھی زور دے رہے ہیں۔سکندرآبادکے رہائشی سریش نے بتایاکہ جب میں بیٹی کے داخلے کے لیے اسکول گیاتو کہاگیاکہ پوری فیس ابھی جمع کرو، تبھی داخلہ کنفرم ہوگا۔حیدرآباد اسکولس پیرنٹس ایسوسی ایشن کے سیکریٹری کے وینکٹ سیناتھ کے مطابق، عدالتوں میں عرضیاں دینے، متعدد ملاقاتوں اور شکایتوں کے باوجود اسکول فیس میں اضافہ مسلسل جاری ہے۔ ان کا کہنا ہے کہ فیس ریگولیشن کمیشن کے ڈرافٹ بل کی منظوری میں تاخیر والدین کے مسائل میں اضافہ کر رہی ہے۔تلنگانہ ایجوکیشن کمیشن کے رکن پروفیسر وشویشور راؤ نے بھی تصدیق کی کہ انہیں کثیر تعداد میں والدین کی شکایتیں موصول ہوئی ہیں۔ انہوں نے مزید بتایاکہ ڈرافٹ بل حکومت کو بھیج دیاگیا ہے، کابینی کمیٹی جائزہ لے رہی ہے۔ حکومت سے درخواست ہے کہ اسے جلد منظور کیاجائے۔والدین کاکہنا ہے کہ اگرحکومت نے فوری طور پر کوئی مضبوط قانون نافذ نہ کیاتو نجی اسکولوں کی من مانی تعلیمی اخراجات کو عام آدمی کی پہنچ سے مکمل طور پر باہر کر دے گی۔